टीकापुरमा अन्तरव्यवस्थापिका सम्मेलन हुँदै

अत्तरिया  : संघीय संसदका दुवै सदन र सातवटै प्रदेश सभाबीच समन्वय, सहकार्य तथा संसदीय अनुभव आदानप्रदानलाई मजबुद बनाउने उद्देश्यका साथ सुदूरपश्चिम प्रदेशको टीकापुरमा शनिबारदेखि उच्चस्तरीय अन्तर–व्यवस्थापिका सम्मेलन हुँदै छ ।

सम्मेलनको शनिबार बिहान प्रतिनिधिसभाका सभामुख डोलप्रसाद अर्याल र राष्ट्रियसभाका अध्यक्ष नारायणप्रसाद दाहालले संयुक्त रूपमा उद्घाटन गर्ने कार्यक्रम छ । उद्घाटन सत्रको अध्यक्षता सुदूरपश्चिम प्रदेशका सभामुख भीमबहादुर भण्डारीले गर्ने तय भएको छ ।
उद्घाटन समारोहलाई सभामुख अर्याल र राष्ट्रियसभाका अध्यक्ष दाहाल तथा सुदूरपश्चिम प्रदेशका मुख्यमन्त्री कमलबहादुर शाहले सम्बोधन गर्ने कार्यक्रम छ ।

यही २३ र २४ जेठमा हुने सम्मेलनमा सहभागी हुन सभामुख अर्याल, अध्यक्ष दाहाल, उपसभामुख रूबी कुमारी र राष्ट्रियसभाका उपाध्यक्ष लीलाकुमारी भण्डारी तथा संघीय संसदका पदाधिकारी धनगढी पुगिसकेको सभामुख अर्यालको सचिवालयले जनाएको छ ।

संसदीय अभ्यास र कानुन निर्माणसम्बन्धी कार्यपत्र प्रस्तुत हुने

शनिबार मध्याह्नपछि सुरु हुने बन्द सत्रमा संसदीय प्रणाली र कानुन निर्माणसँग सम्बन्धित विभिन्न विषयमा कार्यपत्र प्रस्तुत हुनेछन् । संसद सचिवालयका सचिव डा रोजनाथ पाण्डेले ‘लेजिस्लेटिभ एकेडेमी’ तथा ‘संसदीय अनुगमन कार्यमा एकरूपता’, सूचना प्रविधि विज्ञ विनित सत्यालले ‘डिजिटल पार्लियामेन्ट’, संविधानसभा सदस्य खिमलाल देवकोटाले ‘कानुन निर्माण प्रक्रियामा संघ, प्रदेश र स्थानीय तहबीचको समन्वय’ तथा पूर्वसचिव डा सुरेन्द्र अर्यालले ‘आदर्श बजेट निर्माण प्रक्रिया’ विषयमा प्रस्तुति दिने कार्यक्रम छ ।

सम्मेलनका दौरान संघीयता कार्यान्वयनको अवस्था, सभा सञ्चालनका असल अभ्यास, अन्तर–व्यवस्थापिका समन्वय तथा आगामी कार्यदिशाका विषयमा छलफल हुनेछ । ‘टीकापुर घोषणापत्र’ जारी गर्ने सम्मेलनले टीकापुर घोषणापत्र जारी गर्नेछ ।
सम्मेलनको दोस्रो दिन संघीय संसदका महासचिव पद्मप्रसाद पाण्डेयले ‘टीकापुर घोषणापत्र’को मस्यौदा प्रस्तुत गर्ने र आवश्यक छलफलपछि पारित गरिनेछ ।