धनगढी : नेपाली कांग्रेस कैलालीले उमेदवार इच्छुक हुनेलाई पार्टीमा उमेदवारी दर्ता शुल्क तोकेको छ । उमेदवारको संख्या थेग्न नै नसक्ने भएकोले नियन्त्रण गर्न पार्टीबाट इच्छुक हुनेका लागि शुल्क निर्धारण गरिएको हो ।
वडा, पालिकाका उमेदवारको नामावली सिफारिसका लागि धेरै संख्या हुन लागेपछि यस्तो निर्णय गरेको नेपाली कांग्रेस कैलालीका सचिव केशवराज मिश्रले जानकारी दिए ।
वडा, पालिका र क्षेत्रले आफुखुसी उमेदवारी तोक्न थालेपछि जिल्लाले यस्तो निर्णय गरेको हो । नगर प्रमुख पदका आकांक्षीले सात हजार तथा उपप्रमुखले पाँचहजार रुपैयाँ पार्टीलाई शुल्क तिनुपर्नेछ ।
त्यस्तै, गाउँपालिका अध्यक्षले पाँच हजार, उपाध्यक्षले तीन हजार, वडा अध्यक्षले एक हजार र वडा सदस्य पदका आकांक्षीले पाँच सय रुपैयाँ शुल्क तिर्नुपर्नेछ । स्थानीय निर्वाचन नजिकसंगै आकांक्षीहरु उम्मेद्वारीहरु घोषणा गरिरहेका छन् ।
