अत्तरिया : कैलालीको कैलारी गाउँपालिकाका झण्डै ढाई सय घरमा पानि पसेको छ । सोमबार रातिदेखि परेको वर्षाका कारण कैलारीका विभिन्न बस्तीका झण्डै दुई सय ५० घरमा पानि पसेको हो ।
कैलारी गाउँपालिकाका प्रवक्ता तथा वडा नम्बर ७ का वडा अध्यक्ष दिपेन्द्र बमले कैलारी गाउँपालिकाका भुँइयाँफाटा, रामपुर, वसन्ता, नारायणपुर लगायतका वस्तीमा पानि पसि दुई सय ५० घरपरिवार विस्थापित भएका छन् । डुवान भएका वस्तीका घरधुरी अहिले विद्यालयमा बसीरहेको उनको भनाई छ ।
पछिल्लो २४ घण्टामा धनगढी एयरपोर्टमा शून्य दशमलब २ मिलिलिटर वर्षा भएको छ भने टीकापुरमा एक सय सात मिलिलिटर वर्षा भएको छ । कैलालीको कार्णाली नदीको वहाव बढ्दै गएको छ भने अन्य सहायक नदी तथा मोहना नदीको बहाव स्थिर रहेको छ । कर्णाली नदीको बहाव अहिले सात दशमलब ८६ मिटर पुगेको छ । सो नदीको बहाव १० मिटर पुगेमा सर्तकता तह र १० दशमलब आठ मिटर पुगेमा खतरा तह पार मानिने छ । विहान आठ बजेसम्म बर्दिया, सुर्खेत, रौतहट, मकवानपुर, ललितपुर लगायतमा भारी वर्षाका साथै नदी सतह बढेर खतरा तह पार गरेको छ ।
कैलालीका सहायक नदी स्थिर भएपनि मंगलबार पनि कैलालीसहित सुदूरपश्चिमका केही स्थानमा भारी वर्षाको सम्भावना रहेकाले नदी तटिय क्षेत्रका बासिन्दालाई सर्तकता अपनाउन मौसम पूर्वानुमान महाशाखाको अनुरोध छ ।
नेपालमा मनसुनी वायुको साथै बंगलादेशको उत्तरी भू–भागमा तथा आसपास रहेको न्यून चापीय प्रणालीको प्रभावका कारण देशभरका केही स्थानमा भारी वर्षाको सम्भावना रहेको छ ।
‘हाल देशभर सामान्य देखि पूर्ण बदली रही मधेस, बागमती, लुम्बिनी र गण्डकी प्रदेशका धेरै स्थानमा हल्का देखि मध्यम वर्षा र बाँकी प्रदेशका एक दुई स्थानमा हल्का वर्षा भइरहेको छ’ मौसम पूर्वानुमान महाशाखाले जारी गरेको विज्ञप्तीमा भनिएको छ ।
सुदूरपश्चिमको पहाडी जिल्ला जोड्ने भिमदत्त राजमार्ग खानीडाडाँ र बुढीतोला क्षेत्रमा पहिरोले सडक भत्कीएर अवरुद्ध भएको छ । गतरातीको लगायता बर्षले कालोपत्रे सडक भत्कीएको छ भने धेरै ठाउँमा पहिरो गएको यात्रु नरेन्द्र भण्डारीले बताए ।
सुदूरपश्चिमका पहाडी जिल्ला डडेल्धुरा, अछाम, डोटी बाजुरा, बैतडी, बझाङ र दार्चुला आउने र पहाडबाट तराईका जिल्ला कैलाली, कञ्चपुर र काठमाण्डौ जाने यातायातका सधान बाटोमै रोकिएका छन् । गोदावरीमा रहेको काठे पुल समेत जोखिममा परेको छ ।
