अत्तरिया : राष्ट्रिय स्वतन्त्र पार्टी (रास्वपा) कैलाली क्षेत्र नं. ४ को सभापतिमा गोदावरी नगरपालिका अत्तरियाका युवा नेता दुर्गा प्रसाद अधिकारी निर्वाचित भएका छन्।
आइतबार सम्पन्न अधिवेशनबाट दूर्गा अधिकारी कैलाली क्षेत्र नं ४ को सभापतिमा निर्वाचित भएका हुन्। सामाजिक तथा राजनीतिक क्षेत्रमा सक्रिय रहँदै आएका अधिकारी युवामाझ लोकप्रिय र भरोसायोग्य नेतृत्वका रूपमा परिचित छन्।
अधिकारीले जनताको विश्वास, पार्टीको नीति तथा सिद्धान्तलाई आत्मसात गर्दै क्षेत्रको विकास, सुशासन, पारदर्शिता र समृद्धिका लागि प्रतिबद्ध भएर काम गर्ने बताएका छन्।
रास्वपा गोदावरी नगरपालिका उपसभापति गंगादत्त (जीडी) जोशीले पार्टी संगठनलाई अझ सशक्त र प्रभावकारी बनाउन जनताका समस्या समाधान तथा युवाहरूको सक्रिय सहभागिता वृद्धि गर्न सक्षम नेतृत्वको आवश्यकता रहेको बताएका छन्।
उनले कैलाली निर्वाचन क्षेत्र नं. ४ मा दुर्गा प्रसाद अधिकारीको नेतृत्व आवश्यक रहेको उल्लेख गर्दै उनको निर्वाचनले पार्टीलाई थप मजबुत बनाउने विश्वास व्यक्त गरेका छन्।
दुर्गा प्रसाद अधिकारीको नेतृत्वमा रास्वपा कैलाली–४ ले संगठन सुदृढीकरणसँगै विकास, सुशासन र जनउत्तरदायी राजनीतिक अभ्यासलाई प्राथमिकतामा राख्ने अपेक्षा गरिएको छ। स्थानीय तहदेखि क्षेत्रीय स्तरसम्म पार्टीको प्रभाव विस्तार गर्न उनको नेतृत्व महत्वपूर्ण हुने पार्टी कार्यकर्ताहरूको विश्वास छ।