बाजुरा : बाजुरा बडीमालिका नगरपालिकाको वडा नं. ६ र ८ मा रहेको बिरे खोलामा रहेको झरनामा झुल्किएको इन्द्रेणीले आन्तरिक पर्यटकलाई लोभ्याउन थालेको छ। बिहानीको सूर्यको किरणसँगै हल्का पानी परेको बेलामा बिरे झरनामा इन्द्रेणी देखिने गरेको छ।
सामाजिक सञ्जालबाट बिरे झरनाको प्रचारप्रसारसँगै पछिल्लो समय आन्तरिक तथा बाह्य पर्यटकका लागि आकर्षक बन्दै गएको छ। यस झरनाले सर्वसाधारणलाई लोभ्याउन थालेको बडीमालिका नगरपालिका–८, बिरे खोला राप्का होटेलका सञ्चालक दलबहादुर थापाले बताए ।
बिरे झरनासँग त्यत्तिकै लोभिने पर्यटक अहिले इन्द्रेणी पर्न थालेपछि तस्बिर लिन आउने गरेको थापाले बताए । इन्द्रेणी डाँडामा परे पानी रोकिने र खोलामा परे फेरि पानी पर्ने कुरा बुढापाकाले सुनाउँदै आएको स्मरण गराउँदै बडीमालिका–६, राप्ताका दल साउँदले भने, “इन्द्रेणी त झरनामै पर्न थालेपछि रमाइलो देखिने गरेको छ।
बिरे झरनामा इन्द्रेणी झुल्किएको समयमा तस्बिर लिने भएका मालिका माविका प्रधानाध्यापक शुभराज पाध्याय तिमिल्सिनाले इन्द्रेणीलाई ऐरावत भन्ने गरेको जानकारी दिए । उनका अनुसार, यसको अर्थ, इन्द्रले चढ्ने हात्ती भन्ने हुन्छ। यो घाम र पानीको बेलामा सूर्यको विपरीत दिशातर्फ देखिन्छ।
उनले भने, “यसको अर्को नाम इन्द्र धनुष पनि हो। धनुषको आकारमा अर्धवृत्त देखिन्छ। यसमा सात वटा रङ देखिने भएकाले सप्तरङ्गी वा इन्द्रेणी भनिन्छ।
वैज्ञानिक रूपमा भन्नुपर्दा घाम र पानीका कण टल्केर यसको निर्माण हुने गरेको प्रधानाध्यापक पाध्याय तिमिल्सिनाले बताए । यहाँका स्थानीय जिल्ला सदरमुकाम मार्तडी जाने बेला घाम पानी परेमा बिरे झरनामा झुल्किएको इन्द्रेणीलाई हेर्दै र त्योसँगै तस्बिर खिच्ने गर्छन्।
