धनगढी । कैलालीको गोदावरी नगरपालिकामा निर्माण सम्पन्न आधुनिक आर्यघाट आजदेखि औपचारिक रूपमा सञ्चालनमा आएको छ। गोदावरी नदीमा पानी अभावका कारण वर्षौंदेखि भोगिँदै आएको शव दाहसंस्कारको समस्या समाधान गर्ने उद्देश्यले निर्माण गरिएको आर्यघाटको नगर प्रमुख बीरेन्द्र भट्टले रिबन काटेर उद्घाटन गरेका हुन्।
नेपाल सरकारको पर्यटन मन्त्रालयमार्फत २ करोड १० लाख रुपैयाँको लागत र प्रदेश सरकारबाट थप १ करोड रुपैयाँ विनियोजनमा निर्माण गरिएको उक्त परियोजना जगदम्बा भवानी जेभीसँगको ठेक्का सम्झौतामार्फत सम्पन्न गरिएको हो।
नयाँ आर्यघाटको प्रमुख विशेषता अत्याधुनिक अटोमेटिक फ्लसिङ प्रणाली हो, जसले दाहसंस्कार प्रक्रियालाई व्यवस्थित, सुरक्षित र स्वच्छ बनाउने अपेक्षा गरिएको छ। आर्यघाटमा एकैपटक ७ वटा शव दाहसंस्कार गर्न मिल्ने संरचना निर्माण गरिएको छ। साथै, ३ लाख लिटर क्षमताको पानी ट्याङ्की जडान गरिएको छ, जसले सुख्खा मौसममा समेत आवश्यक पानीको आपूर्ति सुनिश्चित गर्नेछ।
यस प्रणालीमार्फत ट्याङ्कीमा सङ्कलित पानी पाइपमार्फत सिधै दाहसंस्कार स्थलसम्म पुर्याइनेछ भने दाहसंस्कारपछि निस्किने फोहोरसमेत व्यवस्थापन गरी नजिकैको खोलामा सुरक्षित रूपमा विसर्जन गरिने व्यवस्था मिलाइएको छ। यसले वातावरणीय सरसफाइमा महत्वपूर्ण योगदान पुर्याउने विश्वास लिइएको छ।
हाल गोदावरी नदी किनारमा अवस्थित यस आर्यघाटमा गोदावरी नगरपालिका सहित आसपासका ६ स्थानीय तहबाट शव दाहसंस्कारका लागि ल्याइने गरिन्छ। तर सुख्खा मौसममा नदीमा पानी नहुँदा परम्परागत दाहसंस्कारमा कठिनाइ हुँदै आएको थियो।
उद्घाटन समारोहमा नगर प्रमुख भट्टले अब वर्षभरि सहज रूपमा दाहसंस्कार सेवा उपलब्ध हुने बताए। “पहिले गोदावरी नदीमा पानी अभाव हुँदा समस्या हुन्थ्यो, अब आधुनिक प्रणालीसहितको आर्यघाट सञ्चालनमा आएपछि जुनसुकै मौसममा पनि दाहसंस्कार सहज हुनेछ,” उनले भने।
यसअघि नै आर्यघाट परिसरमा कालोपत्रे सडक, प्रतिक्षालय तथा ४ कोठे क्रियापुत्रीघर निर्माण भइसकेको छ। नयाँ संरचनासँगै अब गोदावरी क्षेत्रमा दाहसंस्कार सेवा थप व्यवस्थित, सहज र वातावरणमैत्री बन्ने अपेक्षा गरिएको छ।
