धनगढी : कैलालीको धनगढीमा सुदूरपश्चिम मुख्यमन्त्री कप अन्डर १९ महिला राष्ट्रिय क्रिकेट प्रतियोगिता हुने भएको छ । नेपाल क्रिकेट संघको आयोजनामा यहि चैत ६ गतेदेखि ११ गतेसम्म सो प्रतियोगिता सञ्चालन हुने शनिबार पत्रकार सम्मेलनको आयोजना गरि जानकारी दिइएको हो । सो प्रतियोगिताको मुख्य प्रवद्र्धक सुदूरपश्चिम प्रदेश खेलकुद परिषद रहेको छ ।
१९ वर्ष मुनिका महिला क्रिकेट खेलाडीलाई लक्षित गर्दै सो प्रतियोगिता गरिन लागेको संघका अध्यक्ष हरि रेग्मीले बताए । १९ वर्षमाथिका महिला खेलाडीलाई लक्षित गरेर विभिन्न समयमा क्लब तथा संस्थाहरुले खेल प्रतियोगिता आयोजना गर्दै आइरहेका छन उनले भने –१९ वर्ष मुनिका खेलाडीको प्रतिभा पहिचान गर्न प्रतियोगिता गरिन लागेको हो ।
फाप्ला क्रिकेट मैदानमा सञ्चालन हुने सो प्रतियोगिताका लागि अहिले तयारी तिव्र पारिएको उनले बताए । सो प्रतियोगितामा सात वटै प्रदेशका एक÷एक टीमको सहभागिता रहने छ । प्रतियोगितामा प्रथम हुने टीमले पाँच लाख नगदसहित र दोस्रो हुनेले तीन लाख नगदसहित ट्रफि, मेडल प्राप्त गर्ने छन । प्रतियोगितामा उत्कृष्ट खेलाडी, बलर, रनरलाई पनि पुरस्कार प्रदान गरिने भएपनि के–कति दिने भन्नेबारे आयोजकले अहिले सार्वजनिक गरेको छैन ।
खेलकुद परिषदका सदस्य सचिव दीपक सिंहले खेलकुदको प्रवद्र्धन गर्न प्रदेश सरकारले विभिन्न संघ तथा क्लबहरुसंग सहकार्य गरेर प्रतियोगिताहरु सञ्चालन गरिरहेको बताए । उनले अन्य प्रदेशको तुलनामा सुदूरपश्चिम प्रदेशले खेलकुद क्षेत्रको विकासका लागि प्रतियोगिताहरु गरिरहेको बताए ।
