अछाम,१९ चैत : अछामको मङ्गलसेन नगरपालिका वडा नम्बर ७ की एक महिलाको मृत्यु भएको छ। माटो खन्ने क्रममा वडाको जैशीगाँउका हर्क जैशीकी २६ वर्षीय श्रीमती धनसरा जैशीको मृत्यु भएको हो ।
चैते दशैँको लागि घर लिपपोत गर्न माटो खन्ने क्रममा माटो खाडलमा पुरिएर उनको ज्यान गएको स्थानीय विष्णु बहादुर खड्काले बताए ।
जाल्पादेवी सामुदायिक वन क्षेत्रमा पर्ने उक्त ठाउँमा सोही गाउँका पत्र जैशीकी १४ वर्षीय छोरी चन्द्रा जैशी पनि गम्भीर घाइते भएकी छन् । जाल्पा मावि मुंगा्रचौरमा कक्षा ६ मा अध्ययनरत रहेकी जैशी माटो खन्ने क्रममा च्यापिएर घाइते भएकी हुन् ।घाइते जैशीको जिल्ला अस्पताल मङ्गलसेनमा उपचार भइरहेको छ ।
