अत्तरिया, १० बैशाख : गोदावरी नगरपालिका वडा नं १० को सितापुर टोलमा आज (बुधबार) देखि नगरस्तरीय तेस्रो मेयर कप क्रिकेट प्रतियोगिता सुरु भएको छ । न्यू सितापुर युवा क्लबको आयोजनामा प्रतियोगिता भएको हो । कार्यक्रम क्लब अध्यक्ष श्याम स्वरको सभापतित्वमा सम्पन्न भयो । यस्तै कार्यक्रमका प्रमुख अतिथि नगर प्रमुख बिरेन्द्र भट्ट रहेका थिए ।
प्रतियोगितामा १० वटा टिम सहभागी छन् । विजेता टिमले रु. १ लाख ११ हजार, मेडल र प्रमाणपत्र प्राप्त गर्नेछ भने उपविजेता टिमलाई रु. ५१ हजार, मेडल र प्रमाणपत्र प्रदान गरिने आयोजकले जानकारी दिएको छ ।
कार्यक्रमलाई सम्बोधन गर्दै नगर प्रमुख बिरेन्द्र भट्टले खेलाडीका हक हितका विषयमा नगरपालिका प्रतिबद्ध रहेको बताए । उनले खेलाडीको भविष्य निर्माणका लागि आवश्यक संरचना र पूर्वाधार विकासमा नगरपालिकाले प्राथमिकता दिने उल्लेख गरे । “युवा पुस्ता अनुशासन, स्वास्थ्य र नेतृत्व क्षमताको विकास खेलमार्फत् गर्न सक्छन् । त्यसैले खेल मैदानको व्यवस्थापन, स्तरीकरण र नियमित प्रतियोगिताको आयोजना हाम्रो प्रमुख योजना हो,” भट्टले भने ।
नगर प्रमुखले सितापुर टोलमा रहेको खेल मैदानलाई स्तरीय बनाउँदै आवश्यक सुविधा विस्तार गर्ने प्रतिबद्धता व्यक्त गरे । उनले खेलाडीलाई सहयोग गर्न समुदाय, अभिभावक र संस्थालाई समेत आह्वान गरे । प्रतियोगिताले गोदावरी नगरको खेलकुद विकासमा थप ऊर्जा थप्ने विश्वास गरिएको छ, जहाँ युवालाई सकारात्मक मार्गमा अग्रसर गराउन नगरपालिका दृढ देखिएको छ । उद्घाटन कार्यक्रममा नगर प्रवक्ता तथा वडा नं १ का अध्यक्ष गोपालदत्त भट्ट, वडा नं ३ का अध्यक्ष तेजराज अवस्थी, वडा नं १० का अध्यक्ष रविन्द्र शाहीसहित स्थानिय जनप्रतिनिधि, समाजसेवी, बुद्धिजीवीहरूको उल्लेखनीय उपस्थिति रहेको थियो ।
सम्बन्धित पाेस्टहरु