अत्तरिया : कैलालीको गौरीगंगा नगरपालिका वडा नम्बर ७ मनिकापुरका तिलराम चौधरी र नेपालु चौधरीले नेकपा एमाले परित्याग गर्दै नेपाली कांग्रेसमा प्रवेश गरेका छन्।
त्यसैगरी वडा नम्बर ८ चमारीपुरकी ममता नेगीले पनि एमाले त्यागेर कांग्रेसमा आबद्ध भएकी छन्। नवप्रवेशीहरुलाई गोरखबहादुर बिष्ट ‘आनन्द’ले टीका तथा खादा लगाएर औपचारिक स्वागत गरेका हुन्। बिष्ट नेपाली कांग्रेसका तर्फबाट कैलाली निर्वाचन क्षेत्र नम्बर ४ का उम्मेदवार हुन्।
कार्यक्रममा बोल्दै बिष्टले पार्टीमा प्रवेश गर्ने सबैलाई सक्रिय भूमिका निर्वाह गर्न आग्रह गर्दै विकास, सुशासन र जनहितका एजेण्डामा एकजुट भएर अघि बढ्ने प्रतिबद्धता व्यक्त गरे।
उनले कांग्रेस नै लोकतन्त्र, समावेशिता र समृद्धिको भरोसायोग्य शक्ति भएको दाबी गरे। नवप्रवेशीहरुले पनि कांग्रेसको नीति, कार्यक्रम र नेतृत्वप्रति विश्वास व्यक्त गर्दै आगामी निर्वाचनमा पार्टीलाई विजयी बनाउन सक्रिय रहने बताएका छन्। स्थानीय तहमा पछिल्लो समय विभिन्न पार्टी परित्याग गरी कांग्रेसमा प्रवेश गर्ने क्रम बढ्दो रहेको जनाएको छ।
