अत्तरिया : नेपाल प्रिमियर लिग (एनपीएल) को तेस्रो संस्करणअन्तर्गत शुक्रबार दुई खेल हुँदैछन् । पहिलो खेलमा कर्णाली याक्स र सुदूरपश्चिम रोयल्स आमनेसामने हुँदा दोस्रो खेलमा चितवन राइनोज र पोखरा एभेन्जर्सबिच प्रतिस्पर्धा हुनेछ ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने दुवै खेलले टोलीहरूको प्लेअफ यात्रामा महत्त्वपूर्ण प्रभाव पार्ने देखिन्छ । शुक्रबारको पहिलो खेलमा समान ४ अंक बनाएका कर्णाली र सुदूरपश्चिमबिच प्रतिस्पर्धा हुनेछ। तर कर्णालीले एक खेल कम खेलेको छ ।
दोस्रो खेलमा भने चितवन र पोखरा जितको खोजीमा हुनेछन् । चितवनले यसअघि एक खेल जितेको छ भने पोखरा तीनवटै खेलमा पराजित भएको छ । त्यसैले दुवै टोलीका लागि शुक्रबारको खेल अंकतालिकामा सुधार गर्ने अवसर हुनेछ ।
दिउँसो साढे १२ बजे सुरु हुने खेलमा कर्णाली याक्स र सुदूरपश्चिम रोयल्सबीच प्रतिस्पर्धा हुनेछ । दुवै टोलीले जारी प्रतियोगितामा समान दुई खेल जितेका छन् । तर कर्णालीले तीन खेल खेल्दा एकमा पराजय भोगेको छ भने सुदूरपश्चिमले चार खेल खेलिसकेको छ ।
कर्णालीले प्रतियोगिताको सुरुवात जनकपुर बोल्ट्सलाई १९ रनले हराउँदै गरेको थियो । दोस्रो खेलमा विराटनगर किङ्ग्ससँग ४ विकेटको जित निकाल्दै कर्णालीले लगातार दोस्रो सफलता हात पारेको थियो । तर तेस्रो खेलमा काठमाडौँ गोर्खाजसँग ४ विकेटले पराजित भएपछि उसको अपराजित यात्रा टुङ्गिएको थियो ।
काठमाडौँसँग पहिले ब्याटिङ गरेको कर्णालीले २० ओभरमा ६ विकेट गुमाएर १८० रन बनाएको थियो । तर काठमाडौँले १९।४ ओभरमा ६ विकेट गुमाएर लक्ष्य पूरा गरेको थियो । यस खेलमा कर्णालीले राम्रो ब्याटिङ गरे पनि जित जोगाउन सकेन ।
तीन खेलबाट चार अंक जोडेको कर्णालीको नेट रनरेट प्लस ०.२९५ छ । अंक बराबर भएका टोलीमध्ये राम्रो नेट रनरेटका कारण कर्णालीको अवस्था तुलनात्मक रूपमा बलियो छ ।
कर्णालीका लागि कप्तान सोमपाल कामी, साहिबजादा फरहान, गुलशन झा र अन्य ब्याटरको प्रदर्शन महत्त्वपूर्ण हुनेछ । यसै खेलबाट दक्षिण अफ्रिकी अनुभवी ब्याटर डेभिड मिलरले पनि एनपीएलमा डेब्यु गर्दैछन् । उनी नेपाल आइपुगेका छन् ।
अर्कोतर्फ सुदूरपश्चिमले प्रतियोगिताको पहिलो खेलमा लुम्बिनी लायन्ससँग ७ विकेटको हार बेहोरेको थियो । त्यसपछि पोखरा एभेन्जर्सलाई ६ विकेटले हराउँदै पुनरागमन गरेको सुदूरपश्चिम विराटनगरसँग पाँच ओभरको खेलमा ३५ रनले पराजित भएको थियो । तर चौथो खेलमा चितवन राइनोजलाई ५ विकेटले हराउँदै टोलीले दोस्रो जित निकालेको थियो ।
चार खेलबाट चार अंक जोडेको सुदूरपश्चिमको नेट रनरेट माइनस १.०६४ छ । त्यसैले शुक्रबार कर्णालीलाई हराउँदै अंक बढाउनुका साथै नेट रनरेट सुधार गर्ने अवसर पनि टोलीसँग हुनेछ ।
सुदूरपश्चिमका कप्तान दीपेन्द्रसिंह ऐरी, सैफ जैब, ब्रान्डन म्याकमुलन, स्कट कुगेलाइन र शेरफेन रदरफोर्ड टोलीका महत्त्वपूर्ण खेलाडी हुन् ।
एनपीएलका अघिल्ला दुई संस्करणमा कर्णाली र सुदूरपश्चिमबिच दुई पटक प्रतिस्पर्धा भएको छ । दुवै खेलमा सुदूरपश्चिम विजयी भएको छ । अर्थात् कर्णालीले अहिलेसम्म सुदूरपश्चिमलाई हराउन सकेको छैन ।
पहिलो संस्करणमा कर्णालीले दिएको १०२ रनको लक्ष्य सुदूरपश्चिमले १५।२ ओभरमा ४ विकेट गुमाएर पूरा गरेको थियो । सुदूरपश्चिम ६ विकेटले विजयी भएको थियो ।
दोस्रो संस्करणमा सुदूरपश्चिमले पहिले ब्याटिङ गर्दै २० ओभरमा ९ विकेट गुमाएर १३९ रन बनाएको थियो । जवाफमा कर्णाली १९.२ ओभरमा ९४ रनमै समेटिएको थियो । सुदूरपश्चिम ४५ रनले विजयी भएको थियो ।
शुक्रबारको दोस्रो खेल बेलुका साढे ४ बजे चितवन राइनोज र पोखरा एभेन्जर्सबिच हुनेछ । जारी प्रतियोगितामा चितवनले एक खेल जितेको छ भने पोखरा जितविहीन छ ।
चितवनले प्रतियोगिताको पहिलो खेलमा विराटनगर किङ्ग्सलाई ८ रनले पराजित गर्दै सुखद सुरुवात गरेको थियो । दोस्रो खेलमा लुम्बिनी लायन्ससँगको खेल वर्षाका कारण रद्द भएपछि दुवै टोलीले एक–एक अंक बाँडेका थिए ।
तर तेस्रो खेलमा सुदूरपश्चिम रोयल्ससँग ५ विकेटले पराजित भएपछि चितवनको जितको लय रोकिएको थियो । तीन खेल खेलेको चितवनले एक जित, एक हार र एक खेलको नतिजा नआउँदा तीन अंक जोडेको छ। टोलीको नेट रनरेट माइनस ०.४८६ छ ।
चितवनका लागि कप्तान कुशल मल्ल, रञ्जित कुमार, सिकन्दर राजा र अन्य विदेशी खेलाडीको प्रदर्शन महत्त्वपूर्ण हुनेछ । टोलीले यस संस्करणमा आफ्नो ब्याटिङ र बलिङ दुवै पक्षमा सुधार गर्दै प्लेअफ पुग्ने लक्ष्य राखेको छ ।
अर्कोतर्फ पोखरा एभेन्जर्सका लागि जारी प्रतियोगिता सुखद हुन सकेको छैन । पहिलो खेलमा सुदूरपश्चिमसँग ६ विकेटले पराजित भएको पोखरा दोस्रो खेलमा जनकपुर बोल्ट्ससँग ९ रनले हारेको थियो । तेस्रो खेलमा लुम्बिनी लायन्ससँग ८ विकेटको हार बेहोरेपछि पोखरा लगातार तीन खेलमा पराजित भएको छ ।
तीन खेलबाट कुनै अंक जोड्न नसकेको पोखरा तालिकाको पुछारमा छ । टोलीको नेट रनरेट माइनस १.७७० छ । त्यसैले शुक्रबारको खेल पोखराका लागि प्रतियोगितामा पुनरागमन गर्ने महत्त्वपूर्ण अवसर हुनेछ ।
पोखराका लागि कप्तान कुशल भुर्तेल, चमिका करुणारत्ने, रवी बोपारा तथा अन्य विदेशी खेलाडीको प्रदर्शन महत्त्वपूर्ण हुनेछ । विशेषगरी ब्याटिङमा राम्रो सुरुवात गर्न नसक्नु पोखराको मुख्य समस्या देखिएको छ । एनपीएलका अघिल्ला दुई संस्करणमा चितवन र पोखराबिच दुई पटक प्रतिस्पर्धा भएको छ । दुवै टोलीले एक–एक खेल जितेका छन् ।
पहिलो संस्करणमा चितवनले पहिले ब्याटिङ गर्दै २० ओभरमा ७ विकेट गुमाएर १६१ रन बनाएको थियो । जवाफमा पोखरा १३.२ ओभरमा ७४ रनमै समेटिएको थियो । चितवनले ८७ रनको फराकिलो जित निकालेको थियो ।