अत्तरिया : सुदूरपश्चिम प्रदेशको प्रमुख यातायात पूर्वाधारमध्ये एक, खुटिया–बीपीनगर–दिपायल फास्ट ट्रयाक निर्माण कार्यलाई तीव्रता दिने १ अर्ब रुपैयाँको ठेक्का प्रक्रिया अघि बढाइएको छ । यो परियोजनाले सुदूरपश्चिमको यातायात जालालाई मजबुत बनाउँदै आर्थिक तथा सामाजिक विकासमा महत्वपूर्ण भूमिका खेल्ने अपेक्षा गरिएको छ ।
महत्वपूर्ण परियोजनाको अगुवाइ पूर्व भौतिक पूर्वाधार तथा यातायात मन्त्री र नेपाली कांग्रेस सुदूरपश्चिम प्रदेश सभापति माननीय वीरबहादुर बलायरको पहलमा भएको जनाएको छ । डोटी जिल्लाका पार्टी सभापति नरेन्द्रबहादुर सिंहलगायतका नेताहरू र सरोकारवालाहरूले यस योजनामा प्रभावकारी भूमिका खेलेका छन् । बलायरको नेतृत्वमा यस परियोजनाले लामो समयदेखि रहेको यातायात समस्या समाधान गर्ने आशा गरिएको छ ।
फास्ट ट्रयाकको शीघ्र निर्माणका लागि बलायरले संघीय सरकार, प्रदेश सरकार, र अन्य सम्बन्धित निकायहरूसँग समन्वय गरी दिगो विकासको उदाहरण प्रस्तुत गरेका छन् । स्थानीय जनताको माग र भविष्यमा यस सडकले पुगाउने योगदानलाई प्राथमिकतामा राख्दै बलायरले यसलाई राष्ट्रिय महत्त्वको परियोजना बनाउने प्रयास गरेका छन् ।
यस योजनाको सफलताले कैलाली–डोटी र वरपरका जिल्लाहरूको विकासमा नयाँ युगको सुरुवात गर्ने विश्वास गरिएको छ । द्रुत र सुरक्षित यातायात सेवाले स्थानीय उत्पादनहरूलाई बजारमा पुगाउन मद्दत गर्नेछ भने पर्यटन विकासमा समेत टेवा पुग्नेछ ।
फास्ट ट्रयाकको छिटोभन्दा छिटो निर्माण कार्य सम्पन्न गर्न सम्बन्धित सबै पक्षहरूको ध्यानाकर्षण गराउँदै माननीय बलायरले यस योजनालाई प्रभावकारी रूपमा अघि बढाउन कटिबद्धता प्रकट गरेका छन् । सुदूरपश्चिमको आर्थिक विकासमा कोसेढुङ्गा साबित हुने यो परियोजनाका लागि जनस्तरबाट पनि व्यापक समर्थन जुटेको छ ।
सम्बन्धित पाेस्टहरु
