अत्तरिया, ४ भदौ : कैलालीमा प्रहरीले विभिन्न मुद्दाका चार जना फरार प्रतिवादीलाई पक्राउ गरेको छ । जिल्ला प्रहरी कार्यालयको अपराध अनुसन्धान शाखाका प्रहरी नायब निरीक्षक गजेन्द्रबहादुर चन्दको नेतृत्वमा खटिएको टोलीले धनगढी उपमहानगरपालिका क्षेत्रबाट चार जना फरार प्रतिवादीलाई पक्राउ गरेको प्रहरीले जनाएको छ ।
पक्राउ पर्नेमा दुई जना लागुऔषध र अन्य दुई जना चोरी मुद्दामा सजाय निर्धारण भएर फरार रहेका व्यक्ति रहेको जिल्ला प्रहरी कार्यालयका प्रहरी निरीक्षक लोकेन्द्र सिंह कार्कीले जानकारी दिए । उनका अनुसार लागुऔषध मुद्दामा २९ दिन कैद सजाय तोकिएका धनगढी उपमहानगरपालिका–४ बस्ने २६ वर्षीय विजयकुमार नेपाली र धनगढी–३ बस्ने २८ वर्षीय प्रज्वल न्यौपाने रहेका छन् ।
यस्तै चोरी मुद्दामा २५ दिन कैद सजाय सुनाइएका धनगढी उपमहानगरपालिका–४ बस्ने २३ वषर््ीय सुविन भन्ने सुरविर डगौरा र २१ वर्षीय राज चौधरी भन्ने राज सिंहलाई पनि पक्राउ गरिएको प्रहरी निरीक्षक कार्कीले बताए । पक्राउ परेका चारै जना फरार प्रतिवादीलाई आवश्यक कारवाहीका लागि कैलाली जिल्ला अदालतमा पेश गरिएको प्रहरीले जनाएको छ ।
