धनगढी । कैलालीको धनगढीमा रहेको चैतन्य पाठशालाले यही पुस २२ गतेदेखि चैतन्य दोस्रो विद्यार्थी महोत्सव–२०८२ को आयोजना गर्न भएको छ । आज (आईतबार) पाठशालाले पत्रकार सम्मेलनको आयोजना गर्दै महोत्सवका बारेमा जानकारी दिएको हो । शिक्षा र संस्कारको संगमलाई व्यवहारमा उतार्दै आएको चैतन्य पाठशालाले ‘चैतन्य दोस्रो विद्यार्थी महोत्सव २०८२’ आयोजना गर्ने भएको छ ।
विद्यार्थीहरूमा अन्तर्निहित प्रतिभा उजागर गर्नुका साथै सिर्जनशीलता, नेतृत्व क्षमता, सामाजिक चेतना, अन्वेषणशील सोच र आत्मविश्वासको विकास गर्ने उदेश्यले महोत्सवको आयोजना गर्न लागिएको पाठशालाका अध्यक्ष गणेशप्रसाद जोशीले बताए ।
उनले शैक्षिक, सांस्कृतिक, साहित्यिक तथा रचनात्मक गतिविधिहरू समेटिएको महोत्सवले विद्यार्थीहरूलाई व्यावहारिक,जीवनोपयोगी र मूल्यपरक सिकाइको अनुभव प्रदान गर्ने विश्वास लिइएको बताए ।
उनले महोत्सवमा चैतन्य पाठशालाका विद्यार्थीले बनाएको प्लेन उडान परिक्षण, ड्रोन उडान, विज्ञान, अन्वेषण र प्रविधि प्रस्तुति हुने जानकारी दिए ।
पुस २९ गतेसम्म सञ्चालन हुने महोत्सवमा अन्तर–विद्यालय प्रतियोगिताहरू,योग तथा ध्यान कार्यक्रम, रमाइला तथा शैक्षिक खेलहरू, सामुदायिक सेवा तथा रक्तदान कार्यक्रम, स्थानीय परिकार प्रदर्शनी, स्टिम प्रदर्शनी, नाटक मञ्चन र प्राज्ञिक बहस, मौलिक तथा सांस्कृतिक प्रस्तुति, कला, साहित्य, संस्कृति, पुस्तक समिक्षा प्रतियोगिता, कविता, कथा वाचन प्रतियोगिता, माघी मिलन विशेष,चित्रकला तथा हस्तकला प्रतियोगिता हुने छ ।
पाठशालाका प्राचार्य प्रेमनिधि ओझाले विद्यार्थीहरूको अन्तर्निहित प्रतिभाको पहिचान ,विकास र प्रोत्साहन, बौद्धिक, सृजनात्मक, सांस्कृतिक तथा व्यावहारिक सीप विकास, संस्कार, मूल्य र नैतिक शिक्षालाई व्यवहारसँग जोड्दै जीवनोपयोगी शिक्षा प्रवद्र्धन गर्न महोत्सवका आयोजना गर्न लागिएको बताए ।
उनले महोत्सवबाट विद्यार्थीहरूमा आत्मविश्वास, आत्म अनुशासन र नेतृत्व क्षमताको वृद्धि, सैद्धान्तिक ज्ञानलाई व्यवहारसँग जोड्ने अवसर प्राप्त, सिर्जनशील सोच, अनुसन्धान प्रवृत्ति र नवप्रवर्तनशील क्षमताको विकास, सामाजिक उत्तरदायित्व, सहकार्य र सेवाभावको सबलीकरण,सांस्कृतिक पहिचानप्रति गर्व र संरक्षणको चेतना अभिवृद्धि हुने अपेक्षा गरिएको बताए ।
महोत्सवबाट विद्यार्थीमा आत्मअनुशासन, नेतृत्व क्षमता र सामाजिक उत्तरदायित्वको भावना बलियो हुने, सैद्धान्तिक ज्ञानलाई व्यवहारसँग जोड्ने अवसर प्राप्त हुने तथा विद्यालय समुदायबीच दीर्घकालीन सहकार्यको आधार निर्माण हुने विश्वास लिइएको छ ।