अत्तरिया : कैलालीको गोदावरी नगरपालिका वडा नम्बर ८ स्थित मजगाउँमा आउँदो माघ १२ गतेदेखि थारु माघ महोत्सव २०८२ सुरु हुने भएको छ ।
संस्कृति संरक्षण, स्थानीय पर्यटन तथा आधुनीक कृषि प्रर्वद्धनका लागि एकजुट हौँ भन्ने मुल नाराका साथ थारू कल्याणकारिणी सभा, वरघर भलमन्सा गोदावरी नगर समिति, मजगाउँ थारु सामुदायिक होमस्टे र न्यू खुटिया चारपाते युवा क्लबले संयुक्तरुपमा महोत्सवको आयोजना गर्न लागेका हुन ।
माघ १२, १३ र १४ गते मजगाउँ थारु संग्रहालय परिसरमा महोत्सव सञ्चालन हुने थारू कल्याणकारिणी सभाका नगर सचिव फुलाराम चौधरीले बताए ।
महोत्सवको गोदावरी नगरपालिकाका नगर प्रमुख वीरेन्द्र भट्टले उद्घाटन गर्ने कार्यक्रम रहेको छ । महोत्सवमा स्थानीय झाँकीहरू प्रदर्शनका साथै थारु राष्ट्रिय कलाकारहरुको बेजोड प्रस्तुति रहने थारू कल्याणकारिणी सभाका पूर्व कार्यबाहक सभापति एवम् केन्द्रिय पार्षद माधव चौधरीले बताए ।
महोत्सवमा थारु खानपानको व्यवस्था, थारु कला संस्कृतिको जगेर्ना सम्बन्धी विविध कार्यक्रम, थारु कला,सिप झल्कने थारु संग्रहालयको अवलोकनका साथ अन्य रमाइलो मेला प्रदर्शन हुने उनले बताए ।
चौधरीले यसपटक महोत्सवलाई केहि फरक बनाउने उदेश्यले लागूऔषध सम्बन्धि जानकारीमूलक नाटक प्रस्तुत गर्ने तयारी भईरहेको बताएका छन् ।
आयोजकले शनिबार आयोजना गरेको पत्रकार भेटघाट कार्यक्रममा बोल्दै गोदावरी नगरपालिका वडा नम्बर ८ का वडा सदस्य हरिराम चौधरीले मजगाउँमा आयोजना हुँदै आएको माघ महोत्सवले राना थारु संस्कृतिको जर्गेना गर्न महत्वपूर्ण भूमिका खेलेको बताए ।
महोत्सवमा थारू परिकार, कृषि उपज, स्थानीय उत्पादन लगायतका स्टल रहने बताईएको छ । थारू कल्याणकारिणी सभा गोदावरी नगर समितिले २०६७ सालदेखि माघ महोत्सवको आयोजना गर्दै आएको छ ।