धनगढीमा मंसिर ४ गते ‘सुरताल म्युजिक टुर’ आयोजना हुँदै, गायक प्रकाश सपुत र प्रमोद खरेलको प्रस्तुति रहने
धनगढी : सुदूरपश्चिमको कला, संस्कृति, पर्यटन तथा सांगीतिक क्षेत्रको प्रवर्द्धन गर्ने उद्देश्यले धनगढीमा पहिलोपटक ‘सुरताल म्युजिक टुर–२०८३’ आयोजना हुने भएको छ।
चलचित्र पत्रकार संघ नेपाल, कैलाली शाखाको आयोजना तथा सुरताल इभेन्ट एण्ड एम्युजमेन्ट प्रालिको सहआयोजनामा आगामी मंसिर ४ गते धनगढीस्थित रंगशालामा कार्यक्रम हुन लागेको हो।
‘अब गुन्जिन्छ नेपाल, एउटै सुर एउटै ताल’ भन्ने मूल नाराका साथ आयोजना हुने कार्यक्रममा चर्चित गायक प्रकाश सपूत, प्रमोद खरेल, भाका नेपाल, परम्परा, दि फिरन्तेलगायत राष्ट्रियस्तरका कलाकारहरूको बेजोड सांगीतिक प्रस्तुति रहनेछ।
मंसिर ४ गते साँझ ५ बजेदेखि राति १० बजेसम्म सञ्चालन हुने कार्यक्रममा राष्ट्रिय कलाकारहरूको जम्बो टोलीसँगै सुदूरपश्चिमको स्थानीय कला, संस्कृति तथा पर्यटन प्रवर्द्धनसम्बन्धी विशेष प्रस्तुतिहरू समेत रहने आयोजकले जनाएको छ।
चलचित्र पत्रकार संघ नेपाल, कैलाली शाखाका अध्यक्ष विवेक कुमार नागरिले देशका विभिन्न स्थानमा सफलतापूर्वक सम्पन्न हुँदै आएको सांगीतिक कार्यक्रम पहिलोपटक सुदूरपश्चिममा आयोजना गर्न लागिएको बताए।
उनले कार्यक्रमलाई सफल बनाउन सञ्चारमाध्यम, पत्रकार, स्थानीय तह, व्यावसायिक संघसंस्था तथा सम्पूर्ण दर्शकलाई सहयोग र सहभागिताका लागि आग्रहसमेत गरेका छन्।